ब्रेकिंग

महाराष्ट्र

देवदर्शन करून परतणार्‍या पिता-पुत्रावर काळाचा घाला

Samruddhi Dhayagude
16 May 2025

नाशिक : देवदर्शन करून घरी परतणार्‍या पिता-पुत्रावर काळाने घाला घातला. गुरूवारी पहाटे पावणेचारच्या सुमारास नाशिक जिल्ह्यातील मनमाड येथे त्यांच्या दुचाकीला एका मालमोटारीने धडक दिली. यात किशोर ओंकार सोनवणे (वय ४०), त्यांचा मुलगा ऋतिक किशोर सोनवणे (वय ११) यांचा जागीच मृत्यू झाला. तर त्यांचा पुतण्या रवींद्र बाळू सोनवणे (वय २७) हा गंभीर जखमी झाला आहे. हे तिघेही येवला तालुक्यातील नगरसुल येथील वडाचा मळा परिसरातील रहिवासी आहेत.

हे तिघेही दुचाकीवरून देवदर्शनासाठी गेले होते. दर्शन आटोपून परतत असताना मनमाड येथील कृषी उत्पन्न बाजार समितीसमोर मागून येणार्‍या मालमोटारीने त्यांच्या दुचाकीला जोरदार धडक दिली. यात किशोर आणि ऋतिक यांचा जागीच मृत्यू झाला. अपघातानंतर मालमोटारीने दुचाकीला जवळपास चार किलोमीटरपर्यंत ओढत नेले. मालेगाव चौफुलीवर वाहतूक पोलिसांनी गाडीचा पाठलाग करून मालमोटार ताब्यात घेतली, मात्र चालक फरार झाला. मनमाड शहर पोलिसांनी या प्रकरणी गुन्हा दाखल करून तपास सुरू केला आहे. पोलिसांनी मालमोटार जप्त केली असून, फरार चालकाचा शोध सुरू आहे.